الجنيه المسلول ...والشيخ بهلول

الجنيه المسلول .. والشيخ بهلول

رقيتك و استرقيتك من عين الدولار واليورو الجبار
رأقيتك من عين الاسترلينى والريال والدينار
وكل اللى شفوك ونضروك ولا صلوش على النبى
الجنيه عيان والحكومة الغلبانة دايخة وراه وحيرانة من تحاليل لإشعات ودكتارة ومستشفيات فى ناس قالو خد نزلت برد بعد ما طلع م العوم على شط مارينة عريان من غير هدوم … كلام تخاريف بعيد عنك لان العوم دا رياضة والرياضة إفادة …
وناس قالوا مسلول ودى انفلونزا طيور … بس الحكومة الواعية قالت اكيد منظور محسود يا عينى محسود وطلعوا على الشيخ بهلول ودا شيخ ومفيش زيه يجب الجنى فى ثانية ويحل مشاكل الدنيا .
الشيخ بهلول هب وقام على الجنيه العيان حاله بقى كرب ووزنه قل النص وولا عاد فيه جلد ولا حتى عظام .
اشتاتا اشتوت قال الشيخ بهلول محسود محسود معمله عمل جبار على نقطة مايه بزيت شربها على مرة واحدة برغوت نتايه بسبع رجلين ونط على ظهر حوت والحوت عوام وشق السبع بحور وهرب منه البرغوت وراح فى ريش كتوت .
واذاى نلاقى البرغوت ياشيخ بهلول .
علشان نلاقى البرغوت لازم نلاقى الكتكوت وعشان نلاقى الكتكوت لازم نلاقى الحوت و الحوت له أمارة سهلة مش عبارة له زعنفة عارجة بيعوم فى البحر يعرج واللى يلقيه موجود العفريت شلفوط عفريت ابن جنى لف السبع قارات بس له طلبات .
يأمر وهى تجاب بس المهم يا شيخنا يعدلنا الازمات .
محتاج فرخة صبيه حبت ديك حيران اصغر منها بشهرين و3 اسابيع ويومين وكمان صندوق بيرة وعشر علب كفيار اصله عفريت مزجنجى بس ملوش فى الانفاس .
يأمر واحنا نجيب بس فين العفريت اامره يحضر فى الحال .
اشتاتا اشتوت احضر يا شلفوط وهات لنا البرغوت اللى فى ريش الكتكوت .
رد وقال شلفوط انا اجيب الكتوت وانتوا تلاقوا البرغوت .
شفتوا بقى يا رجالة دى الحكومة شقيانة بدور على البرغوت
كفاية بقى اشعات وكلام بتاع قعدات … لموا لسنكوا شويه دا المشكلة لا استثمار ولا عمارت تنهار ولا خصصة ببلاش وملاين راحت عل الناس ولا ملاين منهوبة وعمارات منكوبة ولا حتى ازمة تخطيط …. دا كل شئ مدروس بس الجنيه تعبان … بس المواطن الشقيان الى مش لاقى فلوس ولا بنطلون ملبوس ولا حتى لاقى غموس يصبر شوية كمان على حكومة الغالية لحد ما يجى شلفوط شايل فى ايده الكتكوت وهما يلاقوا البرغوت .
25.02.2004
5.00pm

فى طريق ديموقراطية حقيقية تدعمها البطاطا

فى طريق ديموقراطية حقيقية تدعمها البطاطا

أنا مصري واجمل شئ فى الشعب المصري وحكومته هو التفاؤل وإنكار الذات
والتفاؤل في الشعب المصري اصبح شئ وراثي ومن الصعب تغيره رغم كل الأزمات والظروف الصعبة اللي ممكن تمر بيه.
والغريبة أن التفاؤل من الشعب انتقل للحكومة يعنى مثلا بعد الهجمة المرتدة الرهيبة من رجال الأعمال اللي فقدت فيها البنوك اكتر من (شكرليون جنيه ) والشكرليون دا عشان الفلوس كانت بتتا خد بالشكارة وكل مستثمر خد فلوس على قد الشكاير الى يقدر يشلها وخلع . وفى ظل الانحطاط الرهيب لسعر الجنيه وصعود سعر الدولار والريال والخيار والتحليلات بتقول انهم ممكن يصعدوا لحد سطوح برج القاهرة وصراحة أنا معرفش إذا كان برج القاهرة له سطوح ولا لا لأن عمري ما شفت عليه غسيل منشور بس اللي متأكد منه أن فيه منور ممكن الجنيه يستريح فيه براحته وميتعبش نفسه ويطلع وراهم لحد ما ينزلوا . .
إلا أن فعلا حكومتنا متفائلة ومتمسكة براحة الشعب وحريصة على راحته النفسية وهدوءه ورسم ابتسامه عريضة على وجهه وإلا مكنش نقلت لنا مجلس الشعب لحد البيت اللي بيضحك اكتر من أفلام إسماعيل يس وشكوكو وعوضت الشعب عن ارتفاع أسعار تذاكر المسرح بتاع النجوم الكبار اللي ميقدرش عليها موظف .
وخلت الشعب يثق في حكومته اللي بتطلع وتقول كل شئ تمام وكل شئ كويس وكل اللي حاصل دا كلام عادى ومفيش ضرر حيحصل غير حاجات بسيطة . وقمة إنكار الذات تشوفها من المسؤولين لو حد من أعضاء المجلس قدم استجواب وسأل إلى حصل دا حصل ليه وفين الرقابة عشان تلاقى المسؤول بينكر عن نفسه أي حاجة ويحلف بشرفة انه مكنش موجود سعتها وانه كان بيطبخ لمراته المريضة فى البيت وبيذاكر للعيال عشان مقاطع الدروس الخصوصية ( واعتقد انه أتكسف انه يقول كان وراه غسيل كمان )
لكن كل ده لا يمنع أن الحكومة فى طريقها لأعلنها الخطة الجديدة وهى طبعا خطة معروفة ومتجربة قبل كده وأسستها صباح لما قالت على البساطة البساطة نتغدى جبن وزيتون ونتعشى بطاطا . لكن طبعا التغير فى الخطة واضح نظرا للارتفاع الحالي فى سعر الزيتون مع انه بتباع فى الفيوم على الرصيف بجنيه لكن دا قبل ضريبة الدخل و ومصاريف النقل و وضريبة المبيعات المرحلة الأولي وضريبة المبيعات المرحلة الثانيه وضريبة الدمغة العادية وضريبة الدمغة الاستثنائية وطابع الشرطة والتأمينات والضرايب واللي خلت سعره يوصل لأكتر من خستاشر جنيه . وكمان لا يجوز أن نعتمد على الجبن نظرا لجنون البقر والخوف من قيام البقر بإضراب شامل عن إنتاج الحليب فى ظل ضعف قواها العقلية بعد دخول الفراخ البورصة وأخذها ـافنوانزا طيور جعلتها تأخذ مكانتها الإجتماعية المستحقة وسط أنواع الأكلات اللى مبيشفهاش الموظف إلا لما يعمل جمعية .
ولذلك لا يوجد بديل غير البطاطا الله ينفخ فى صورتها ويزود لنا محصولها كمان وكمان حتى تكون الخيار الشعبي فى المرحلة القادمة ودا طبعا عشان الخيار سعره ارتفع واحتمال الاتجاه للخس كأداة تكمليه بعد تجنيب الفجل والجرجير لاحتوائهم على الفاشوليا .
ولإقناع الشعب بالفكرة والتمهيد لها جماهيريا في أقوال من مسؤولين وأن كانت أخبار غير مؤكدة أنه تم تشكيل لجنة متخصصة فى داخل مجلس الشعب ولها كافة الصلاحيات والبدلات والمكافآت لتقوم بالتعاقد مع بياع بطاطا متخصص للحضور داخل مجلس الشعب والظهور أمام كاميرات التلفزيون و الجلسة منعقدة بحيث يظهر الأعضاء فى الجلسة وهما قعدين يشتروا منه ويكلوا وكل الاتجاهات تشير الى أن البائع اللي تدور معه المفاوضات حاليا هو عم حسين اللي بيقف على نصية الكورنيش من حية المنيل عشان عربيته استانلس استيل مش خشب لكن عمتا الفكرة المقترحة بتحاول المسعادة بحيث تكون البطاطا هي الخيار الديمقراطي الأول للشعب بعد اتخاذ أعضاء المجلس قدوة ليهم .
أكيد كل ده بيدينا انطباع أن الحكومة قدرة على تخطى كل العقبات الاقتصادية القادمة فى ظل الطريق الديموقراطي الذي تدعمه البطاطا وأكيد كلنا عندنا أمل وثقة فى أن الحكومة قادرة على تنفيذ وعودها والنهوض بها وبنا الى طريقة افضل ومستقبل اكرم .

وسلمتكم .
( وسلمولى على بنت خالتي لو مشفتهاش (مع إني معنديش خلات أصلا

هو مال امتى

هوا مال أمتي

يوم أجازه وقلت اقضيه في بيت أهلي بقى شويه كده راحة دماغ من الشغل وسنينه واقعد كده في السرير

لحد العصر بدل ما أنا بنام أربع سعاة كل يوم بالعافية واصحي أكلي أكلة كده من أيد أمي إلى بقالي زمان

مكلتوش بدل ما معدتي انهرت من أكل بره إلي معنتش أصلا بدور على نوعه .

بس المهم فضلت كده لبعد الظهر بشوية في السرير وصحية لقيت العيله ملمومة قدام التلفزيون ومتنحة

ومبتنطقش وقعدين مبلمين رحت ميل على الحاجة أمي وقلت لها عاوز اتغدى من أيدك قلت لى لا دا

البرنامج مهم ولسه قدامه سعتين لو جعان انزل اشترى أكل قلت في نفسي يبقى بقى لازم استني.

ورحت قاعد معاهم قدام التلفزيون واتفرجوا بقى يا جماعة شوية ناس لبسة قمصان خضرة على موف

وعليها كرفت نبيتى ومعاهم مذيعة عملة شعرها باين احمر على ازرق وأعدين يتكلموا كلام كبير كده

بتاع مثقفين وكل واحد بتكلم فى موضوع والتاني يقاطعه ومحدش له دعوة بالتانى وأنا قاعد مش فاهم

حاجه .صراحة حسيت بغبائي وجهلي رحت مميل على الحاج وسألته هما بتكلموا عن إيه يا حاج لقيته

كده بصلي بصه مش عجبانى وقالي يبنى أنت مش عايش فى الدنيا دول الناس إلى حيعدلوا اقتصدنا

المايل . قلت الكلام كبير بجد بس شكلي لسه صاحى من النوم ولازم اركز المهم بقى رحت مركز وهى

عشر دقايق وتنحت إني افهم كلمة ولا موضوع ولا أساس بيتكلموا عليه واصلا هو إيه إلي بيحصل مش

فاهم بس فهمت انهم كانوا بيتكلموا فى التصدير وازاى مصر لازم تقدر تصدر فى رؤيا المتغيرات

الاقتصادية الجديدة والتكتلات الاقتصاديه العالمية . بس لازم الدخل القومي يزيد ولازم عشان دا يحصل

نعلى الضرايب شويه ونفكر فى المرحلة الرابعة من ضريبة المبيعات (هما مش اتنين بس لحد دلوقتى

قلت لنفس جايز التالتة أطبقت وأنا في الشغل من غير ما اعرف) وشويه كده وسألت الحجة هما قالوا

إحنا مبنعرفش نصدر ليه راحت قايلة يبنى وهو دا سؤال طبعا علشان مفيش دعاية مع إن الجودة فى

السما . يعنى هما قالوا كده (راحت بصالي بصة كده خلتني في نص هدومي وقلتي يبنى بلاش هيافة دى

ناس بتتكلم في حاجات اكبر من كده .

قعدت استني كلمة تنفع افهمها على قد تعليمى بتاع الجامعة وتخصصي فى التسويق انى افهم مش لاقى

مع انى عارف ان عند الدنيا كلها كده حاجة اسمها التحميل على المنتج ودى بقى الفلوس الى بتنضاف

على المنتج زى الضرايب والجمارك والرشاوى والناس الحلوة بتاعة الفرح ده ودى عندنا كده عدت

20% من سعر المنتج يعنى لو أنت مصنع حاجة بجنيه وعاوز تكسب خمسة قروش يبقى حتبعها ب

جنيه وربع مع إن نفس الحاجة دى لو صيني حتوصلنا بجنيه وعشرة صاغ فى بلدنا يعنى ارخص من

حجتنا طب ليه عشان هناك وفى بلاد تانيه عمرة النسبة دى ما عدت 7% وفى بلاد فى شرق آسيا

بتوصل فيها لصفر و1% وافتكرت لما العربيه الألماني إلي متصنعة في مصر رجعت من لبنان عشان

سعر العربية الألماني إلى متصنعة في ألمانيا سعرها ارخص وجودتها أعلى .

بس شوية كده ولقيت الناس إلى قعدين يتكلموا مع بعض فى التلفزيون ماسكين في بعض وكل واحد

بحلف بالطلاق وفك كرفتته النبيتى إلى على القميص الأخضر وحالف يضرب زميله والمذيعة عمالة تلطم

وولا حد سمعها


3 سعات عدت وأنا حموت من الجوع والعيلة ملمومة قدام التلفزيون محدش بينطق ولا فاهم حاجة وسط

ناس عماله تتكلم عن المتغيرات والعولمة والبلهارسية ووصلت في الأخر أنها طلبت انهم يقيلوا

مدرب المنتخب علشان مزاج الناس يبقى كويس ولما يبقى كويس الاقتصاد يتعدل .

بس كده رحت مميل على ابوى الحج الخبرة فى الدنيا وسألته هما قالوا الاقتصاد مال ليه .

قلى يبنى انا بقالى 60 سنه بسمع انهم بيحولوا يعدلوه بس نفسى اعرف حاجة واحدة بس هو اصلا مال
امتى.

بصيت له كده وسكت وصحيح معاه حق هو فى بلد طول عمرها اقتصدها مايل وكل يوم حكومه جايه

وحكومة رايحة ومحدش لقلها حل يعدلها مفهمتش بس طلعت كتب السياسة والتاريخ والاقتصاد عشان

افهم وقعدت ادور وادور واخيرا طلع العيب مش فيهم ولا فينا وطلع ان المشكلة ان الفراعنة كانوا حرميه

أهو كلام

أهو كلام

أهو كلام

قول يا مهبول

واشبع وكل فول

الفول بيربى العقول

وعقلك انت ولا ابو الهول

زى الحجارة وبابه مقفول

حنفضل عمرنا نزيد ونقول

نكتب شعر وناكل فول

لحد ما تهرب منا الحلول

ونسرح بجردل أم الخلول

او نغنى فى سوق الخضار

بعربية كاروا شددها حمار

ونصرخ نحب فيك يا خيار

اصل الحب اخره مرار

زيه زى لعب القمار

تحب وتخلص وتعد محتار

ازاى توصل وتاخد قرار

وكل يوم ملوش نهار

شقة وعربية يا عم اختار

حبك ولا الحاج دولار

وست تأمر بصوت جبار

من قوته يهد جدار

من حقها تكويك بالنار

مهى صحبت الحج دولار

وشقة وعربية وفطار كفيار

بلاش تفكير واوصل لقرار

دى حسبة بسيطة ليه تحتار

لتبقى فار لتبقى حمار

حكومة رايحة وحكومة جاية

حكومة رايحه وحكومة جاية
هذا ما يدور فى الشارع المصرى الآن فى ظل الكلام عن حدوث تغير حكومى متوقع فى الشهور القادمة وكالعادة الكل يعيد حساباته سواء الشعب أو الحكومة أو حتى الحكومة القادمة
وكالعادة تترك كل فترة آثارها داخل التاريخ المصرى على مجرى العصور من أول الفراعنة وأهراماتهم وأثارهم إلى العصر الرومانى ومكتبة الإسكندرية ثم العصور الإسلامية وعصور الخلافة المختلفة وما تركته لنا من قصور وقلاع ومساجد إسلامية
إلى عصر النهضة الحديثة بداية من محمد على وقناة السويس و الأوبرا ثم السد العالى وبرج القاهرة وصولا إلى النايل سات وقنواته الفضائية ومدينة الإنتاج الإعلامى ودريم لاند .
وبالفعل استطاع كل عصر على أن يترك بصمته الواضحة على التاريخ المصرى والمجتمع المصرى ولكن ماذا تخطط له الحكومة القادم فى ظل النجاح المنقطع النظير التى حققته الحكومة السابقة مستقبلا
فها هى الحكومة الحالية تفى بكل وعودها التى وعدت بها الجميع .
وعدت بالقضاء على مشكلة البطالة وبالفعل استطاعت القضاء عليها حيث لا نسمع الآن عن أى شكوى من شباب الخرجين بالنسبة للبطالة وعدم حصوله على عمل نظرا لان كل من يحيط به عاطل لا يستطيع الحصول على عمل .
وعدت بعمل توازن فى أسعار السلع الأساسية وارتفاعها ووفت وها هى السلع كلها ترتفع أسعارها لتكون فى مستوى واحد وبالتالى لا نستطيع أن نقول أن أسعار إحدى السلع اغلى من غيرها أو اكثر ارتفاعا وماذا تفعل اكثر من أنها وضعت الفراخ البيضة فى مرتبة ولاد الذوات وفتحت لها برصة مخصوصة لتصبح الفراخ البياضة تلعب كاراتيه ورياضة حتى تصل إلى اعلى مستويات اللياقة والقدرة على الإنتاج .
ودعمت الجنيه بأحسن المدربين المتخصصين حتى انه استطاع العوم بعد ما غرق ونفسه أتقطع .
وعدت بوضع الاقتصاد المصر على ارض ثابتة وها هى تفى بما وعدت حيث أن الاقتصاد المصر الآن يقف على ارض أثابته وصلبه حتى لو كانت هذه الأرض فى قاع المحيط ربما لأنها الأرض الوحيدة الثابتة التى وجدتها .
من الآخر تعمل إيه تانى بعد ما موتت نفسها فى خدمة الشعب والبلد حتى على المستوى السياسى حيث أصبحت مصر دولة سلم وسلام رغم كل العوائق والزلازل التى تحيط بالمنطقة وكأننا نعيش على سطح كوكب آخر المريخ مثلا ولا ننتمى لما يحيط بنا بصلة .
بالفعل يجب أن نحمد ربنا على انه ابتلانا بهذه الحكومة وما حققته لنا بلى أرى انه يجب على الشعب أن يقدم لها نوط استحقاق نظرا لخدماتها ومجهوداتها السابقة حتى لو كان نوط خشبى نظرا لارتفاع أسعار الذهب والنحاس والفضة .
ولكن لماذا تخطط الحكومة القادمة الآن وما هى المشاريع المستقبلية التى ستقدمها للشعب وهل سوف تتخذ نفس خط الحكومة السابقة فى ظل الظروف الحالية . اعتقد أن الحكومة القادمة يجب أن تمتاز بمواصفات خاصة جدا عن أى حكومة سابقة فمثلا
يجب أن تكون حكومة علمة حتى تستطيع أن تتوافق مع عصر العولمة الذى يعيشه العالم الآن ويجب أن يكوم جميع أعضاؤها مصابين بالصرع حتى يستطيعوا التأقلم مع صراع الحضارات الحالى .
كما يجب عليها أيضا أن تدعم فكرة الخصخصة بكل قوة حتى يصل الشعب إلى مرحلة انه لا يهتم إلا بالذى يخصه وهو لقمة العيش أن وجدت
كما أنها يجب أن تمتلك فكر اكبر انفتاح على العالم من كل الذين سبقوها حتى تستطيع دعم فكرة التحرر والحريات فهل من المعقول أن تصبح أفغانستان اكثر انفتاحا فى المستقبل عن مصر آو تتحول العراق إلى ساحة دعارة ديموقراطية فى شهور قليلة ومصر ولا تستطيع مجاراتها وهل يسمح الشعب المصرى أن يوصف بأنه شعب جاهلى متخلف فى ظل الحريات المنطلقة داخل المنطقة على الطريقة الأمريكية .
أعتقد انه على الحكومة القادمة أن تتبنى مشروع يحمل كل معانى الانفتاح حتى نثبت للعالم اجمع أننا قادرين على مجاراة العالم فى أفكاره وأننا لازلنا نملك زمام القيادة داخل المنطقة لكن يجب أن يكون هذا المشروع متميز غير قابل للمنافسة واقترح عليهم إنشاء اكبر كباريه فى العالم على ارض مصر العظيمة على أن يختاروا منطقة سياحية مميزة وما اكثر ما تملكه مصر من هذه المناطق وتحويلها إلى كباريه مفتوح ولترى ما سوف يجنيه مثل هذا المشروع من فوائد مثل زيادة الدخل الحكومى نظرا لتدفق السياح على الزيارة وأيضا زيادة دخل الجمارك نظرا لزيادة استيراد الخمور وتوفير فرص عمل كبيرة ولا نهائية للشباب داخل هذه المنطقة كما أنها سوف تقوم بترويج كثير من البضائع الكاسدة لان السايح حيشترى أى حاجة وهو سكران . بالفعل مشروع مثل هذا سوف يقوم بإنعاش الاقتصاد القومى خاصة إذا تم دعمه ببعض الراقصات المصريات المميزات ذوات السمعة العالمية وما أكثرهم فى هذا البلد وأيضا دعمه ببعض ممثلات السينما العالمية واعتقد انهم لن يترددوا فى الاشتراك فى مثل هذا المشروع زيادة عن دعمه بكل أنواع العاب القمار المعروفة من الروليت إلى البلاك جاك .
بالتأكيد لن انسى النقطة وفوائدها الكثيرة وما سوف توفره الحومة للشعب منها .
ولن أتحدث طبعا عن الخطوط العريضة المعروفة التى سوف تسير عليها الحكومة القادمة مثل الوصول إلى تطبيق المرحلة التاسعة فى ضريبة المبيعات وتعليم الجنيه الغطس بعد العوم ورفع الجمارك مرة أخرى على السلع التى يتم تصديرها بعد أن اثبت المنتجين انهم لازال فى استطاعتهم التصدير حتى لو عادت السلع بعد تصديرها المهم انهم قدروا يصدروها
وكل ما أتمناه أن توفق الحكومة القادمة فى طريقها مثلما فعلت الحكومات التى قبلها
وأن نصبر على بلائنا حتى يزول