الجامعات المصريه الجريمه والعقاب 3

مش عاوزين امن ومش عاوزين شركات خاصة طيب ايه اللى المفروض يحصل ... طول عمر الجامعه فيها امن وفيها مظاهرات وفيها وسياسة وفيها دهارة وجوتاز عرفى وخناق ومشاكل .... اللى اتغير اساسا عقلية الطالب زمان لحد بداية الالفينات مهما كان حجم المظاهرات فى الجامعه عمر الامن ما كان بيدخل ولا حتى عمره قبض على طالب فى الجامعه اول ما المظاهرة تعدى بابا الجامعه كان الطحن يبتدى وكانت عربيات الامن المركزى بتتقلب وتتحرق وكانت المظاهرات لما بتبتدى فعلا وتحاول تطلع بتبقى اشرس واكبر من اللى بيحصل دلوقتى وفى الغالب الامن هوا اللى كان بيحاول تجنب الاشتباكات مع محاولة احتواء المظاهرات فى مساحات معينه اللى كان بيعتقل كان بيعتقل من بيته ... يمكن من بدايت التمنينات لحد بداية 2000 الامن ما دخلش الجامعه ومراحل المظاهرات فى الفتره دى رغم بعدها كانت اقوى وكانت بتجتاح جامعات مصر كلها مجرد ما عين شمس او المنصورة او الاسكندريه يبدأوا تلاقى كل جامعات مصر قامت .... بس اللى محدش واخد باله منه حاجة مهمه جدا ...ان طوال الفتره دى مهما كان حجم المظاهرة عمر ما حد فكر يعمل اى نوع من انواع العنف داخل الجامعه او حتى يكسر فرع شجرة ... اول بداية للعنف نهاية 2005 وبداية 2006 اشتباكات الاخوان مع الدكاترة بسبب انتخابات اتحاد الطلاب بعدها تدخل الامن بعدها عرض عسكرى للاخوان داخل الازهر وبعدها تكرار العرض فى عدد من الجامعات .... السؤال الان هل من حق الامن التدخل فى الجامعه وفى النشاط الطلابى بالتأكيد لا ماذا لو تحولت اساسا المظاهرة من السلميه للاعتداء على منشأت الجامعه او افرادها ... اعتقد ان فى هذه الحالة فقط يستطيع الامن التدخل .... لا يجوز لاحد ايقاف ابداء الرأى ابدا داخل الجامعه لكن من الاكيد انه لا يجوز لطالب ايضا الاعتداء على اى منشأه او فرد بالتالى وجود الامن طبيعى والتظاهر ايضا طبيعى وتدخل الامن طبيعى فى حالة الاعتداء ... عدم التوازن السياسى فى الجامعه هو اساس المشكله اصلا منذ بداية عام 2005 وفعلى مر السننين وعلى رغم تزايد التيار الدينى فى الجامعات الا ان كان هناك دائما تيار موازى يستطيع ان يعد التوازن للجامعه ويبقى الجانب المهمش الذى لا يهتم سوى بالعلم او بالمخدرات والجنس ولا يستطيع اى تيار ان يطغى على الاخر ...ما يحدث الان فى الجامعه هو نتاج سنين طويله انفجرت تباعيتها بعد ثورة 25 يناير وحتى الان لا يوجد اتجاه ينظر للجامعه على انها حل وليست مشكله ويتم حل المشاكل بالقطعه ... ولا يوجد كالعادة سوى اتجاه واحد فقط جاذب هو الاتجاه الرافض اى كان النظام ... الحل ليس عدم تسيس الجامعه كما يدعى البعض فطالب الجامعه الان هو صانع السياسة مستقبلا .... الحل ببساطه هو تنظيم السياسة فى الجامعه وتقديمها للطلبه بطريقه تتيح لهم حق الاختيار وصحة التحرك ... مظاهرات الجامعه لن يتم القضاء عليها امنيا ابدا ولم يستطيع احد ذلك على مر التاريخ وتذكروا فقط حادثه كبرى عباس وفتحه على الطلبه ايام الملك والاحتلال وعدد الوفيات وما حدث بعدها ..... الحل هو السياسة وموازة الفعل برد الفعل ... الحل هو انتاج اتجاهات اخرى قادرة على الاستقطاب بطريقة صحيحه وبالتأكيد لا يجب ان تكون هذه الاتجاهات مواليه وبالتأكيد ايضا لا بد ان يكون لها دور فى الرفض السياسى المنظم الفعال .... تهميش الجامعه او قمعها واو تفريغها سياسيا لن يقدم حلا ابدا
فى الاسفل مقالان يتحدثان عن اختلاط المفاهيم داخل الجامعه من عام / تامر سليط
http://tamersilit2.blogspot.com/2006/12/blog-post_13.html#links

http://tamersilit2.blogspot.com/2007/10/2.html 

من الاخر

الواقع اللى الكل حيعترض ويشتمنى عليه 

اللى حصل فى التحرير امبارح مش اول مرة يحصل وكل مرة بيحصل كان بيعتمد على فكر القطيع وسياسة القطيع  10 او 15 واحد يبتدوا ووراهم جيش وكل مرة كان  مدفوع من اتجاهات تانيه  ضد اللى جوا التحرير  وللاسف كل الاتجاهات اتورطت فى نفس اللعبة  بما فيها السلفين والاخوان ... ايام ظاهرات ضد حكم مرسى فى بنات اتخدت فى الشوارع اللى فى الجنب اتخطفت بالسلاح من نص التحرير وتم اغتصابهم  فعلا  والاعلام مسلطش الاضواء على الموضوع .... ايام حكم  طنطاوى حصلت نفس النصايب فى التحرير واوسخ ... الحادثة مش الاولى لكن الاعنف واللى عارف التحرير كويس عارف ان كل مرة حصلت  كان بيبقى وراها اتجاه. ونفتكر الصحفية الاجنبيه اللى الظابط طلعها بالسونتيانة والست اللى مع جوزها اللى اتهرى ضرب وهى اتقطعت والتلفزيون كله نقل 

اللى حصل ده مكنش بيحصل فى الاعتصامات الكبرى لان تقريبا الميدان بيكون عارف بعضه وفى تكتلات وتنظيم قادره على توقيف كل ده .

اللى عارف الميدان كويس عارف ان عمر ما اتجاه واحد قدر يسيطر على الميدان من غير اختراق يا اما عمليات زى دى يا اما مواجهت عنيفة على اطراف الميدان .

الواقع بيقول ان الفيديو اللى اتصور صورة شبكة رصد ونزل على النت مدفوع بالتالى فى خلال يوم شافه اكتر من ربع مليون واللى صور كان فى قلب الحدث من اول لحظة وهو مراسل رصد اللى هوا  اصلا معادى لاى شئ ناتج عن 30 يونيو .

اللى بيحصل مدفوع ايوة لكن سياسة القطيع عيب مجتمعى خطير مش حيهالج فى يوم جايز تفهمه لو نزلت العشوائيات  وشفت مدى التدنى المعيشى اللى هوا فيه ومدى انعدام الخدمات  او فكرت فى شباب فى ثانوى عارف انه علشان يتجوز قدامه خمسين سنه حتى لو خد دكتوراه فى الطتقه النوويه . او بصيت على الباعة الجائلين او فهمت ان نص بلطجت بتوع الميكروباص جايه من ان نص ميكروباصات مصر ملك أمناء شرطه وظباط  ... اللى بيحصل مش حينتهى فى يوم ومش حينتهى ابدا لو اللى بيحكم اى كان بقى السيسى او غيره فكر فى التوازونات وتأمين موقفه وتحيد معارضه وخلق معارضه على كيفه علشان يرسخ لفكرة واللى جاى بعده ..مش حينتهى غير لو مفكرش فى اى حاجة واشتغل بجد للناس وساعتها فعلا لا حيهمه معارضه ولا تيار معين لان الناس حتكون فى ضهره سند ..

الفترة الجايه الخريطة السياسية فى مصر حتتغير بشكل كبير جدا وحتشوف انقسامات بالهبل حتى فى الاخوان و 6 ابريل ومؤيدين السيسى نفسه وكله حيتخانق على حته من التورته .... لو النظام دخل فى الليله وابتدى يلعب بنفس نظام اللى قبله ان يكسب ده ويقوى ده ويضعف ده انا بقول من دلوقتى حنشوف فتنه دينيه فى الصعيد اكبر من اى مرة شفناها وحنشوف احداث اوسع من احداث بورسعيد وكله حيتورط فى العنف وحنوصل لمرحلة كل الاتجاهات حتبعت بلطجيتها فى يوم واحد زى ما حصل فى استاد بورسعيد ونصحى على مدبحة وكل الاتجاهات بتصوت وتقول مليش  دعوة ....

لو انت متخيل ان فى اتجاه فى مصر معندوش بلجيه وسرسجيه بيعرف يشغلهم فانت واهم ...  ولو انت متخيل ان كل واحد اتكلم باسم الثورة انسان نضيف فانت كمان واهم ولو متخيل ان كل انسان نضيف عرفته دخل فى العمل السياسى فى ال 3 سنين اللى فاتوا لسه بنفس مستوى نضافته فانت اكيد مجنون .

حضرتك فى ناس بتطلع تتكلم  فى التلفزيون باسم اتجاهات وجبهات وهما اساسا قبل الثورة كانوا بيشتغلوا فى الدعارة وفى ناس  من المثقفين بيتكلموا كفايه انك تطبق 10 جنيه فى ايده وكيلوا كباب ويقول اللى هوا عاوزه .

فى بلطجيه عملوا ثروة من ايام نهب ما بعد 25 يناير كملوها لما اشتغلوا مع العسكرى واشتروا ميكروباصين وعربيه نص عمر اول ما مرسى مسك بس المرسيدس والعمارة مجبوهاش الا  ايام رابعه  ... وحيفضلوا شغلين وكل لون شغال ... مش مصدقنى اسأل فى فيصل ودار السلام حتلاقى حواديت واسماء بتتقالك بالاسم ... حتلاقى ناس بيتقلك دول عملوا فلوسهم من التثبيت وبيع العربيات المسروقه من بعد الثورة ... ولو سألت فى اى وقت حتكتشف ان ده بيحصل فى كل الاوقات وبعلم الحكومه سواء بقى ايام المجلس او مرسى او حتى عدلى ...

للاسف العيب فى منظومه مش فى نظام وكل واحد بيجى بيشتغل على نفس المنظومه وبنفس الفكر حتى لو اختلفت الوجوه ... والشعب نفسه هو المسؤل الاكبر والمتورط الاكبر  لانه رغم كل اللى حصل فى السنين اللى فاتت وكل الدم اللى سال والوشوش اللى اتغيرت كان هدفه تغير النظام مش المنظومه نفسها ... بالتالى كان الوش والنظام  بيتغير انما المنظومة ثابته واللى عمله مبارك عمله العسكرى وعمله الاخوان واقل شويه عدلى منصور لكن عمله برده ....

على الصفحة دى قلت من قبل النتيجه 20 مرة اللى جاى سواء حمدين او السيسى  حيبقى همه ان الاخوان اللى بيسندها سواء كان 6 ابريل او الاشتراكين الثورين او دعم الشريعه يفضلوا معارضه موجوده هما والارجوزات اللى مشهورين فى الاعلام وبيتكلموا باسم الثورة وبيعرضوه وحيبقى الصراع مع قوى جايز مش حاسس بيها الشارع لكن مؤثرة ووطنيه وده اللى حيبقى همه انه يقضى عليها.... وفى الحالة دى الصراع جاى جاى والدم جاى جاى .... الحل الوحيد للبلد دى فعلا ان واحد يشتغل بجد للناس بعيد عن اى توازونات يواجه اللى يقبله مش يخطط انه يعمل معارضه تبقى شماعة وفزاعة للفشل والخوف من قبل ما يبتدى ... مش يفكر ازاى حيسكت الناس لو قامت من قبل ما تقوم ..... اى حد حيتقى ربنا ويشتغل بجد وحتى لو معملش تحسن كبير ...اى حد حيحاول بجد الناس دى حتبقى فى ضهرة ومش حتقوم مهما زاد ضغط معارضيه... اى حد حيشتغل على توازونات حتى لو حقق نجاح الناس حتقوم عليه سواء طال الزمن او قل لانه مش حيوصل للناس كلها .

من الاخر اى حد حيفكر فى مصر ومصر بس حينجح والبلد دى حتتصلح حتى لو محققش الا تقدم قليل جدا ... ولو معملش كده يبقى كل حاجة متخيلها من اغتصاب 

وتحرش ودم حتفضل موجوده /// تامر سليط

سيسى وحمدين حمدين والسيسى

السؤال الصعب اللى لازم تقف وتسأل لنفسك عملنا ثورة .... كام وش جديد ظهر من قلبها وقدر يدخل فى لعبة الرياسة للاخر سواء كسب او خسر ... بس قدر يكمل ...... بعد مبارك عمر سليمان بعد عمر سليمان طنطاوى بعد طنطاوى شفيق ومرسى بعد مرسى عدلى منصور والسيسى ...... طيب من الوشوش اللى اتحسبت على 25 يناير بس الاول نتفق ان الثورة مينفعش تتحسب على اتجاه معين بالتالى ندور على حد مطلعش من قلب اتجاه او طلع بس محاولش يخدم الاتجاه بتاعه .... ودور على اسماء الميدان .... ابو اسماعيل تيار اسلامى ودخل بكل تقله علشان يلم كل الاتجاهات وفشل ... الاخوان مثلهم اتنين مرسى و اتجاهه عشناه وابو الفتوح وحاول يلم التيار الليبرالى والناصرى وفشل .... حمدين صباحى لحد هذه اللحظه وبعد سنتين من اخر انتخابات لا قدر يقدم برنامج انتخابى يقدر يقنع بيه الشارع او يخرج من دور عبد الناصر وحتى جمع التيار الاشتراكى حوله فشل فيه .... البرادعى حدث ولا حرج من كتر الرقص وسطه اتخلع ولا شفنا مبادئ نافعه ولا حركه تغير ولا حزب دستور نفع وفشل حتى النخاع مع الشارع المصرى اللى كان بيحترمه ....يفضلك صاحب الرومانسيه الثوريه خالد على وعدد الاصوات اللى خدها فى الانتخابات الاولى شاهد على فشله .... اكيد مش حنتكلم على عمر سليمان وشفيق وعمرو موسى اللى ان كان شعورك ناحيتهم الا انهم محسوبين على نظام مبارك .......الواقع بيقول ان كل الوشوش الكبيره مقدرتش حتى انها تحتوى اتجاهها
طيب الوشوش الصغيره غباء سياسى وغباء فكرى واللى ظهر منهم فعلا مسائل التمويل الخارجى والخيانه والتامر وتورطهم فى احداث عكس اتجاه الشارع زى محمد محمود ووزارة الدفاع وماسبيروا كانت كفيله بعزلهم عن الشارع .....
يفضل مين ما اتكلمناش عنه السيسى ..... طيب هو السيسى له علاقة ب 25 يناير طبعا مش كان رئيس المخابرات الحربيه وقتها ومن غير الجيش مكنش مبارك مشى .... بس اكيد هوا زيه زى طنطاوى اخره انوا مبارك مشى يعنى هوا متورط مع طنطاوى فى كل فضايحه ومع مرسى كمان وسكوته لمدة سنه ومليون قضيه زى كشوف عذريه وسحل وضرب وطحن ...مهواش خضرة الشريفه ومهواش شيطان .... واللى الشارع طلبه عمله .... زى ما الجيش كان سبب فى نجاح 25 يناير ومن غيره مكنتش حتنجح ...زى مالشعب له الدور الاساسى فى 30/06 ومن غير الناس مكنش السيسى حيعمل حاجه ..... طيب هو السيسى مع الثورة اقف واسأل نفسك لانى انا معرفش ....
بس السؤال الاهم هى الثورة طلع منها مين يقدر يعدل حال البلد اصلا
.... لو تعرف حد قولى وقولى مكانه فين بالضبط دلوقتى .... قولى مين قدر يشيل مبادئ الثورة ويكمل ويفضل موجود فى الشارع ...لو بتصارح نفسك فعلا حتكتشف ان مفيش حد قدر يكمل .
طيب ليه دا بيحصل علشان اساسا اى مساحة بين فكر سياسى وثقافى والشارع ابعد من المسافه بين البرنس بتاع الكبده وكوالالمبور ... ولان الشارع عاوز ياكل ويعيش فى امان ... وكل النخبه يا بتفكر فى شهرة او فلوس او مركز بالتالى لما بتتكلم بتتكلم بالطريقه اللى يتم التعليق عليها وتاخد سوكسيه .... لكن عمرها ما اتكلمت بالطريقه اللى يحس بيها الناس وتعلق مع الناس ..... بالتالى يا عم الناشط متستغربش لما تلاقى حمدين لابس وش عبد الناصر والناس مش شيفاه وعمال يتكلم فى مشاريع والناس مش فاهمه ولا عارفة وحاسه .... والسيسى جاى مبيقولش حاجة اصلا وتلاقى الناس فى الشارع شيفاه عبد الناصر والسادات والناصر صلاح الدين كمان و يقولك غيروا اللمض حيغيروا حتى لمبة التلاجه وبير السلم حيقولهم وفروا ربع رغيف حيوفروا نص والكهربا تتقطع البنى ادم البسيط حيستحمل .... عارف ليه ..... علشان حاجتين وصلوا للشارع اول حاجه انه فى ضهرهم وتانى حاجه انه محتاجهم ومش حينجح من غيرهم والناس البسيطه محتاجه تحس ان لها قيمه واللى عايش فى العشوائيات عاوز يحس ان اللى بيحكمه فى ضهره ....
لو متخيل ان شعبية السيسى لها علاقة ب 30/6 اكيد بس مش السبب الرئيسى لان جنبه فى يوم 03/07 كان 50 اسم تانى واقفين بيقولوا نفس البيان وبياخدوا نفس الموقف ولو الشارع كفايه عليه 30/06 كان كفايه على طنطاوى 25 يناير ومكنش الشارع سب لطنطاوى ميت دين ومله بعدها لما ابتدى يعك ...... وعاوز اقولك يا عم الناشط وياعم المثقف لو السيسى قدر يحقق ربع اللى بيقول عليه الناس حترضى وحتفضل تدخل على الفيس تحس ان فى ثورة وتيجى تنزل الشارع تلاقى نفس واقف لوحدك وسط الامن زى ايام مبارك ..... والمصيبه اللى انت مش فاهمها ان لو السيسى حقق ربع اللى بيقول عليه او الشارع حتى حس انه ممكن يتحقق وطلب انه يغير الدستور علشان الحكم يبقى مدى الحياه الناس حتوافق وانت لسه واقف لوحدك وسط الامن المركزى عمال تخطب وتهاتى ..... المشكله الحقيقه فى فهمك انت للشارع مش فى فهم الشارع ليك .... المشكله انك لسه واقف مستغرب هى ليه الناس شالت مرسى علشان النور بيتقطع ومبيتكلموش على السيسى ...... لا حضرتك فاهم غلط لان الناس مخرجتش على مرسى علشان النور بيتقطع لا الناس قامت على مرسى علشان عمل اعلان دستورى يخدمه وعلشان قعد اللى قتل السادات جنبه فى 6 اكتوبر وعلشان عمل مؤتمر لجماعته يدعم سوريا وعلشان صورة نجاد وهو رافع صباعين بالتشهد فى الازهر عند الانسان العادى اصعب مليون مرة من صورة مليون واحد مسحول ولا مقتول من الاخوان ...... الناس انتخبت مرسى لما كانت حاسه ان الاخوان جماعه فى وسط الشارع وناس بتوع ربنا وفى ضهرهم وشالت مرسى وحرقته لما حست ان الاخوان والتيار السلفى بيشتغلوا لنفسهم ...... المشكله انك مش حتفهم انك بتتكلم مع شعب فترات حريته من ايام الهكسوس اقل من فترات احتلاله ومش علشان هو مكسور ولا ضعيف لو فاهم جده تبقى لا ناشط ولا مثقف تبقى غبى ولا مؤاخذه الشعب الضعيف لما دوله بتحتله بتأثر فيه وبتغير فى لغته وثقافته وده محصلش فى مصر الا مرتين مره مع المسيحيه ومرة مع الاسلام
الشعب ده مش ضعيف زى ما انت فاهم لا الشعب ده مشكلته الحقيقه انه بيصبر ومش منظم وانفعاله لحظى لو مفهمتش ده يبقى طول عمرك عمرك ما حتقدر توصل للشارع ولما الشارع يتحرك مش حيبقى بسبب انك انت اللى حركته لا حيبقى بسبب انه زهق من اللى بيحصل فيه وانت كل اللى عملته انك نظمت مش اكتر وفترة قيادتك للشارع ما حتدعى لحظات .... فكر وافهم وانت حتفهم ليه لما السيسى قال التظاهر بيخرب البلد الناس البسيطه وافقت وانت وقفت تخطب ولما محدش سمعك وقفت تهرش فى راسك .. لان الراجل البسيط حيستحمل كل حاجه طالما فى حاجة بتتغير ومش حيتظاهر وميهموش ان التظاهر يتمنع لانه حتى لو التظاهر اتمنع وهو مش عجبه برده الراجل البسيط حيتظاهر حتى لو لوحده ومن غيرك طالما اللى بيحصل مش عجبه وحيسيبك لوحدك لو اللى بتعمله مش عجبه وهو اللى حيختار حتى لو كان اختياره غلط .... افهم ان البلد دى اولها ونهايتها واسسها الشارع اللى بيتفرج على التلفزيون ويهز راسه ويصلى ويشرب بعد الصلاه مخدرات وصاحب صحبه حتى لو خانه وعدو عدوا حتى لوزنله ا لتراب بدهب .... التورته فى العشوائيات والصعيد والفلاحين مش فى المديا والمؤتمرات ..... يا ناشط ومثقف وفاهم ..... راجع نفسك وافهم ليه بعد اربعسنين ثورة انت لسه واقف مكانك
تامر سليط
08/05/2014

فى ايه يا ولاد ال...............

يكفى ان تتابع الاخبار لمدة ساعة واحده حتى تخرج عن شعورك لتصيح فى ايه يا ولاد ال....

وصلنا لنقطة عدم المنطقيه ... فعلى الرغم من ان احكام الاعدام على اعداد كبيرة مستفزه ومحاولة تصوير الاعلام ان كل من كان شاهد على الاحداث من شرفة منزله يستحق الاعدام وان القرار لا يحمل اى ابعاد سياسيه ...... الا ان الاكثر استفزازا كلام سلميتنا اقوى من الرصاص وطريقة الايحاء بان كل ما حدث اساس لا يستحق حتى المحاكمه وكان كل من قتلوا فى كرداسه او المنيا كلاب وكان الاخوان هم القطه الوديعه ..... كان كل ما يحصل من تفجيرات هو حق مكتسب وكان شيا لم يحدث وكان احداث سيناء وتفجيرات مديرية امن المنصورة والقاهرة لا علاقة لها بالتيار الاسلامى او تدعيات فترة حكم الاخوان .... كان القتل عمليه فرديه ولم يكن هناك اضعاف عدد من تم محاكمتهم متورطين فى القتل والحرق رايناهم وشاهدناهم يسحلون الضباط فى المنيا او يحملون ار بى جى فى كرداسه ..... 

نفس الوضع مع حكم 6 ابريل ومحاولة تصويره على انه قرار حظر الشيطان فى رمضان او القضاء على الطهارة الثوريه فى مصر ..... 6 ابريل تورطت كثيرا فى كثير من الاحداث المشبوهة وتورط الكثير من قادتها فى كثير من الشبهات وكانت الداعم المدنى الرئيسى لفوز مرسى وحملة عصر الليمون .

6 ابريل وكفايه تحوى ايضا الكثير من الشرفاء 6 ابريل 6 ابريل اى كان ما عليهم هم بداية الثورة وهم من اعادوا هذا الشعب إلى الشارع هم من واجهوا الشرطه ومبارك من 2008 وصولا الى الثورة .... 

الوشوش التى دعمت 6 ابريل اثناء الثورة والتى قامت بالتمويل هى الاخرى مثل ممدوح حمزه هم ابطال المشهد السياسى الان بالتالى اذا اردت محاسبة 6 ابريل يجب عليك محاسبة من مولهم ايضا وسجنه لمشاركته فى الخيانه 

بالتالى اذا كان هناك من اخطاء او خان فى 6 ابريل يجب محاكمته ام حظر الجماعة فى المجمل فهى اشارة واضحه للعداء للثورة والقضاء على البقيه الباقيه منها متناسين تماما ان اصل الثورة فى الشارع لا يخضع لاسم او حركة او حزب او اتجاه .

اما اذا اردت ان تتعدى الصراخ والسب لتصل لمرحلة الجلطه توجب عليك متابعة لقاءت السيى لمصالحة مرتضى وشوبير وعز وزينه وعنتر ولبلب ... وعليك ايضا متابعة حملة حمدين ومحاولتها المستميته لتشويه السيسى متناسيه تماما حمدين نفسه حتى تحول الحوار الى ما بين مؤيدن السيسى ومعارضين السيسى ..... فى حين تناسى الاعلام نفسه انجازات سياسيه خارجيه لم تحدث منذ ايام السادات.

اللامنطقيه هي الاساس الان والعك والتجارة الفاشله بالعقول هى الاساس الان فلا منطق او مهنيه سواء فى الاعلام او من السياسين او الثوارممايجعلك فى النهاية لا تجد سوى تعبير واحد تطلقه مرغما هو ..... 

فى ايه يا ولاد ال.....

Tamer Silit 

29/04/2014