تاج وامرنا لله

التاج ده جالى من شرين

وحنرد عليه وامرنا لله ما باليد حيلة

لو مكنتيش مصري بس عربي كانت هتبقى ايه نظرتك للمصرين واللى بيحصل فى مصر دلوقتى؟

اكيد كنت ححترمهم زى كما شغلى خلانى احترم جميع الجنسيات اللى بتعامل معاها ماعدا اليهود اللى فى فلسطين
واكيد كشعب وانا مواطن عربى بتفرج على اللى بيحصلهم كانوا حيصعبوا على وكنت حستنى اى زلالزال علشان ابعتلهم مساعدات واخد فيهم ثواب
لكن نظرتى لحكومتهم اكيد ما كنتش حتختلف عن دلوقتى نفس النظرة حكومة فى إدها الكتير جدا بالنسبة للصعيد الداخلى ودا ملناش دعوة بيه فى السؤال ده وبالنسبة على الصعيد الخارجى بحكم مكانة مصر وموقعها كدولة محور ودولة مواجهة فى الوطن العربى وكمان وزنها السياسى فى المنطق واعتبرها لحد يومنا ده الدولة القائده
ولكن طبعا اتخلت عن كل ده وسابت حجات كتير تحصل لدرجة ان معدش لها دور اصلا يبقى حبص لها كحكومة ازاى اكيد حبص لها كده!!!!

لو كنت اوربي او غير مسلم هتبقى ايه نظرتك للعرب والمسلمين؟

سواء عربى او مسلم او اروبى انا مش حتغير لانى من الاخر مش بكون وجهات نظر مسبقة فى حاجة بالتالى نظرتى كانت حتبقى نفس نظرتى دلوقتى للاوضاع يعنى ما كنتش حعتقد ان المسلمين ارهابين مثلا او شعوب متخلفة اندفاعا مع اللى بيتقال فى وساءل الاعلام الغربى
المشكلة فى السؤال ده انى صعب اتخيل نفسى مش مسلم لانى مسلم عن قناعة مش علشان اتولدت مسلم وخلاص ولانى اخدت لفه كبيره على افكار واديان وقناعات كتيرة مختلفة كلها كانت بتوصلنى انى اعرف اسلاممى اكتر وادور فيه اكتر بالتالى حتى لو كنت مش مسلم كنت حفضل الف لحد ما ابقى مسلم

لو قالوا لك انك بقيت رئيس جمهورية هتعمل ايه؟

حتشل اكيد اصل مش ديما كل اللى بيكسر يتصلح

وشرف مصر مش ولاعة ولو حد فاهم كده يبقى غلطان

ودلوقتى حتى لو جبنا جوز عفاريت يحكموا اكيد حيفشلوا علشان اللى انكسر كتير قوى
بس اكيد حوافق علشان دى فرصة من دهب لحجتين اتنين
الاولى انى حخرج ناس كتير قوى من السجن لازم يخرجوا
والتانيه انى حدخل الاى سجنوهم مكنهم

لو سمح لك برؤية الرسول صلى وانك هتقولى كلمه واحده؟

حقول الشهادة
اعتقد مستحيل فى حاجة ممكن تكون فى الدنيا اجمل من انك تجدد ايمانك فى موقف زى ده بين ايد الرسول صلى الله عليه وسلم

لو كنا فى عصرازدهار الاندلس كنت تتخيل نفسك ازاى؟

اكيد برده كنت حكون واحد من الشعب بس لابس عباية وعمة و فى الاخر برده حتسجن علشان اللى بكتبه ما هو فيه ناس ما بيعجبهاش العجب يا ناس
يعنى حتى لو ما كنتش لقيت حاجة اعترض عليها كنت حعترض على قصور اسبانيا اللى متبناش زيها فى الوطن العربى كله واقولهم ليه بتعملوا كده

لو خطبت واحده او اتخطبتى لواحد واثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟

الموضوع ده عندى غير قابل القسمة على اتنين اساسا
انا اصلا ضد الجواز من غير حب والجواز للجواز والكلام ده
بالتالى معنى انى خطبيت يعنى حبيت يعنى لقيت واحده صعب انى القاها تانى وعندى استعداد احارب العالم كله علشنها وما اتنزلش عنها إلا لو هى اتنزلت وقالت لى سلام سعتها حمشى
بالتالى حرتبط بيها من غير تفكير
وكمان انى ارتبط بوحده بحبها والتجربة تفشل لاى سبب مش مهم اسمه فشل وحقدر اتعايش معاه وحقول الحب ما حققش اللى بحلم بيه
بس لما اتجوز واحده مش بحبها واسيب واحده بحبها واللى مش بحبها تطلع عينى علشان لا انا بحبها ولا هى بتحبنى وافضل عايش كده علشان مش حلاقى سبب للانفصال لانها حققت اللى الواحد بيدور عليه زى البيت والعيال والاسرة والكلام ده ايه الحل اى حاجة مش سبب كافى للطلاق واتدبست يا معلم العيال حلها سهل نتبنى اى حد من تحت اى كوبرى وشوف مصر فيها كام كوبرى بقى
وسبب تانى كمان شخصى جدا انى اتحطيت فى موقف مشابه تقريبا فى وقت من الاوقات بس انا المفروض اللى كان المفروض يتحكم عليه بعد ما عملت حادث برة مصر وبعد عملية قعدت اكتر من 18 ساعة ورراها عمليتين تكمليتين حصل تلوث قالوا ان العمليات كلها فشلت بسببه وانى مش حمشى تانى بالتالى قررت ارجع اكمل علاج فى مصر وبما ان ما حدش فى مصر كان يعرف حاجة كان لازم اقول لخطيبتى قبل ما اجى وفعلا قولت لها قبل ما اجى ومجرد تفكيرى فى ان اخيرها فى اللى تعمله سواء تكمل او لاء قابلنى بثورة وغضب شديد لمجرد التقكير فى كده على الرغم من ان ده كان معناه حجات كتير تتاجل وعلى الرغم من ان الامور تقريبا وقتها كانت بتقول انى فعلا مش حمشى تانى والكلمة دى ما اتغيرتش غير بعد 6 شهور علاج الدكاترة قالوا انى ممكن ارجع امشى تانى بعد سنتين على الاقل
النهاردة تقريبا عدينا السنة ونصوقربنا من السنتين بعد الحادث وخطيبتى لسه معايا وما اتنزلتش لحظة ومستحملة وانا والحمد لله رجعت امشى بفضل ربنا رغم كل التشخيصات الاولى واخر عملية عملتها من شهر تقريبا على الرغم من انها اتعملت قبل ميعدها بكتير جدا وان حتى الدكتور بتاعى مكنش عاوز يعملها انما اتضر يعملها جابت نتيجه فوق ما اى حد
يتخيل يبقى مين بقى قال انى لما حاخد واحدة الدكاترة بيقولوا انها مش حتخلف برده مش حتخلف فى الاخر ربنا كبير وعليم ورحيم وفوق كل شئ

لو طلعت على القمر هتكتب ايه؟

كنت اتمنى ان اكون الاول
لكن يكفينى اننى استطعت الوصول

لو مررت التاج لحد وماجاوبش هتعمل ايه؟

عادى حقه
حتى لو قال
انا مش حجاوب عليه علشان جاى منك
برده حقه ومش حزعل

تمرر التاج لمين؟

سمر (همس السمر)

اسامة يس (وميض )

a Dreamer with feet on the Floor